Bakı, 30 mart, Xəzərİnfo. Qazaxıstan.

Qazaxıstanın “Sahil mühafizəsi” Regional İdarəsinin sərhədçiləri 4 azərbaycanlı brakonyeri saxlayıblar. Onlar “Bayda” tipli qayıqla brakonyerlik fəaliyyəti ilə məşğul olublar.

Xəzərİnfo Oxu.az-a istinadən xəbər verir ki, Qazaxıstan Milli Təhlükəsizlik Komitəsinin Sərhəd xidmətinin məlumatına əsasən, brakonyerlər Milli Təhlükəsizlik Komitəsinin sərhəd xidmətinə məxsus “Taraz” gəmisində olan sərhədçi heyətin tələbinə reaksiya verməyərək sürəti artırıb və Qazaxıstanın daxili sularından qaçmağa çalışıblar.

Havaya 2 xəbərdarlıq atəşi açılıb, brakonyerlər təslim olublar. Silah tətbiqi zamanı xəsarət alan olmayıb. Qayığa baxış zamanı ümumilikdə çəkisi 946 kq olan kallada ilə dolu 25 qutu və 240 ədəd nərə balığı aşkar edilib.

Saxlanılma ilə bağlı hüquq-mühafizə orqanları məlumatlandırılıb. Araşdırma aparılır.

XƏZƏRİNFO.AZ