Bakı, 1 oktyabr, Xəzərİnfo, Region. Rusiya Federasiya Şurası Müdafiə və Təhlükəsizlik Komitəsinin sədri Viktor Bondarev Rusiyanın Suriyada əməliyyatlara başlamasından bu yana 112 rus əsgərinin həyatını itirdiyini bildirib.

Xəzərİnfo Reyting.az-a istinadən bildirir ki, Bondarev Rusiya Silahlı Qüvvələrinin Suriyada əməliyyatlara başlamasının üçüncü ildönümü münasibətilə mətbuat bəyanatı verib.

Sovetlər Birliyi dövründə Əfqanıstanda ilk üç il ərzində təxminən 4 min 800 əsgər, ən azı 60 tank və 400 zirehli vasitə ilə 15 təyyarə, 97 helikopter itirdiklərini xatırladan Bondarev deyib:

"Hazırda silahlı qüvvələrimiz Suriyada 112 əsgər itirib. Bu əsgərlərin təxminən yarısı “An-26” təyyarəsinin qəzası və “İl-20” təyyarəsinin vurulması ilə ölüb. Bundan başqa, 8 təyyarə, 7 helikopter və bir neçə zirehli maşın itirmişik". 

Bondarev 2003-2006-ci illərdə İraqda həyata keçirdiyi əməliyyatlarda ABŞ rəhbərliyindəki koalisiyanın 2 min 515 hərbçi, 10-20-ə yaxın tank, ən azı 50 zirehli maşın, 15 təyyarə və təxminən 80 helikopter itirdiyini bildirib.

Rusiyanın “An-26” tipli hərbi təyyarəsi bu il martın 6-da Hmeymim hərbi hava bazasında texniki səbəblərlə düşmüş, içində olan 39 Rusiya əsgəri həyatını itirmişdi.

Suriyada sentyabrın 17-də kəşfiyyat uçuşu keçirən və 15 əsgər daşıyan Rusiyanın “İl-20” təyyarəsi Aralıq dənizi üzərində Suriya hava müdafiə raket sistemi ilə vurulmuşdu.

XƏZƏRİNFO.AZ